दशैं विदापछि खुलेको बजारको दमदार ओपनिङ भएको छ । वाणिज्य बैंकहरुको सेयरमा खरीद चाप ह्वात्तै बढेका कारण नेप्से परिसूचकमा उछाल आएको छ भने कारोबार रकममा पनि उल्लेख्य सुधार आएको छ ।

नेपालको सेयर बजार बैंक तथा वित्तीय संस्थाहरुबाट बढी प्रभावित हुने बजार हो । बजार पूँजीकरणको हिसाबले पनि वाणिज्य बैंकहरुका कारण यो समूह अग्र स्थानमा छन् । यहीकारण वाणिज्य बैंक समूहमा चमक आउनेबित्तिकै त्यसले समग्र बजारलाई नयाँ रौनकले भरिदिन्छ । बुधबारको बजार त्यस्तै देखिएको छ ।

कतिपय लगानीकर्ता तथा विश्लेषकहरु लगानीकर्ताहरुले लगानीको क्षेत्र फेर्दै अगाडि बढ्नू र त्यसमा पनि बजारलाई लिड गर्ने समूहका स्क्रिप्ट चल्न थालेपछि वास्तविक बुल सुरु हुने र बुधबारको प्रवृति केही दिनसम्म निरन्तर रहे नेप्से परिसूचक अलटाइम हाईमा पुग्नसक्ने अनुमान लगाइरहेका छन् ।

हालसम्म नेप्से परिसूचकको अलटाइम हाईको विन्दू १८८१ हो । केही दिनसम्म वाणिज्य बैंकको स्क्रिप्टमा बुधबारको जस्तै आकर्षण रहने हो भने अलटाइम हाईको विन्दूलाई नेप्सेले निकै चाँडै ब्रेक गर्ने संभावना देखिएको विश्लेषकहरुले दाबी गर्न थालेका छन् ।

कारोबार सुरु भएदेखि नै बैंकिङ समूह बढ्न थालेको छ । यो समूहका कारण समग्र बजारमा रौनक छायो ।

बजार बन्द हुँदासम्म बैंकिङ समूह ५५.१५ अंकले बढ्यो ।

तपाईको प्रतिक्रिया