रुरु जलविद्युत लिमिटेडको आईपीओमा आवेदन दिन आज मंगलबार अन्तिम दिन रहेको छ। धितोपत्र बिक्री प्रबन्धक एनएमबि क्यापिटल लिमिटेडका अनुसार आज बैंकिङ समयसम्म यो आईपीओमा आवेदन दिन सकिन्छ।

कम्पनीले अंकितमूल्यमा २० रुपैयाँ प्रिमियम थपेर १२० रुपैयाँ दरले कुल ४ करोड ८९ लाख २४ हजार ७२० रुपैयाँबराबरको आईपीओ निष्कासन गरेको छ। कम्पनीले कुल ४ लाख ७ लाख ७०६ कित्ता सेयर निष्कासन गरेको छ। जसमा २ प्रतिशतले हुन आउने ८ हजार १५४ कित्ता कर्मचारीका लागि र ५ प्रतिशतले हुन आउने २० हजार ३८५ कित्ता सामूहिक लगानी कोषका लागि छुट्याइएको छ भने बाँकी ३ लाख ७९ हजार १६७ कित्ता सेयरमा सर्वसाधारणले आवेदन दिन पाउनेछन्।

यो आईपीओमा सर्वसाधारणले नेपाल धितोपत्रबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु र तिनका तोकिएका शाखाहरुबाट आवेदन दिन सकिनेछ। यो आईपीओमा लगानीकर्ताले न्यूनतम १० कित्ता र अधिकतममा सम्पूर्ण कित्ताका लागि आवेदन दिन सक्नेछन्।

सीडीएससीका अनुसार सोमबार साँझ ५ बजेसम्म १२ लाख ९५ हजार ४१४ आवेदकबाट १ करोड ८५ लाख ४५ हजार ४८० कित्ताका लागि खरिद आवेदन परेको हो। जुन २ अर्ब २२ करोड ५४ लाख ५७ हजार ६०० रुपैयाँबराबरको हुन आउँछ। यो हिसाबले यो आईपीओमा झन्डै ४८.९१ गुणा बढी आवेदन परेको हो।

यसअघि कम्पनीले गत माघ २१ गतेदेखि फागुन २१ गतेसम्म पहिलो चरणमा आयोजना प्रभावित क्षेत्र गुल्मी जिल्लाका बासिन्दाका लागि आईपीओ निष्कासन गरेको थियो। आयोजना प्रभावितलाई यो कम्पनीले कुल ४ लाख ७ हजार ७०५ कित्ता आईपीओ बिक्री गरेको थियो।

आईपीओ निष्कासनपछि कम्पनीको चुक्तापुँजी ४० करोड ७७ लाख ५ हजार ५०० रुपैयाँ पुग्नेछ।

तपाईको प्रतिक्रिया