उपराष्ट्रपति रामसाहय प्रसाद यादवको प्रमुख आतिथ्यता तथा परराष्ट्रमन्त्री एनपी साउदको विशिष्ट अतिथ्यतामा सम्पन्न भएको साधारणसभाले चेक रिपब्लिकका अनररी कन्सुल जनरल विष्णुकुमार अग्रवाललाई नयाँ डिनका रुपमा नियुक्त गरेको छ।

कार्यक्रमको उद्घाटन गर्दै उपराष्ट्रपति यादवले नेपालको द्वौत्य सम्बन्ध रहेका तर आवासीय राजदूतावास नभएका विभिन्न ५९ देशमा अनररी कन्सुलर कप्र्सले पुर्याएको योगदानप्रति कृतज्ञता व्यक्त गरे। ‘आर्थिक समृद्धिको यात्रामा अग्रसर रहेको नेपालका लागि सबै राष्ट्रसँग सुमधुर सम्बन्ध बनाई राख्नु आजको आवश्यकता हो। यसमा एचसीसीएनको सहयोग रहने अपेक्षा गरेका छौँ’, उनले भने, ‘नेपालमा लगानीका सम्भावना भएको क्षेत्रहरु धेरै छन्। विदेशी लगानी आकर्षित गर्न र नेपालले भोगिरहेको जलवायु परिवर्तनको समस्याको समाधानका लागि सम्बन्धित राष्ट्रसँग समन्वय गर्न आवश्यक छ।’

कार्यक्रममा परराष्ट्रमन्त्री साउदले एचसीसीएनका सदस्य मुलुकहरुलाई नेपाल भ्रमणका लागिमात्र गन्तव्य नभई लगानीको राम्रो गन्तव्य भएको सन्देश दिन आग्रह गरे। उनले दौत्य सम्बन्ध कायम भएका देशहरुको प्रतिनिधित्व गर्दै गरेका निःस्वार्थ सेवा कार्यहरु तथा नेपालको व्यापार तथा पर्यटन प्रवर्द्धनमा खेलेको भूमिको प्रशंसा गरे।

साउदले एचसीसीएनका सदस्यहरुबाट प्रदान गर्ने सेवालाई सहज गर्न पहल गर्ने पनि बताए।

कार्यक्रममा एचसीसीएनका डिन दिनेश श्रेष्ठले भियना कन्सभेनसनअन्तर्गत रहेर एचसीसीएन र यसका सदस्यहरुले आफ्नो जिम्मेवारी निर्वाह गरिरहन भएको बताए। उनले नेपाल भ्रमणमा रहनु भएका एचसीसीएन सम्बन्ध नागरिकको सुरक्षा र हेरचाहमा कुनै कमी नल्याएको पनि बताए। ‘प्रविधि स्थानान्तरण, व्यापार व्यवसाय विस्तार तथा दिपक्षीय सम्बन्धलाई अझ प्रगाढ बनाउन हामीले भूमिका निर्वाह गरिरहेका छौँ’, उनले भने, ‘हाम्रो जिम्मेवारी निर्वाह गर्न महत्वपूर्ण सहयोग गर्नु भएकोमा म परराष्ट्र मन्त्रालयलाई आभार व्यक्त गर्दै आगामी दिनहरुमा पनि यस्तै सहयोगको अपेक्षा गरेका छौँ। हाम्रो निस्वार्थ सेवालाई सहज बनाउन आवश्यक सहयोगका लागि नेपाल सरकारलाई अनुरोध गर्न चाहन्छौँ।’

कार्यक्रममा उपराष्ट्रपति यादवले एचसीसीएनका पूर्वडिनहरु गजेन्द्रबहादुर श्रेष्ठ, अम्बिका श्रेष्ठ (स्पेन), विनय मान श्रेष्ठ (कोलोम्बो), पद्म ज्योति (साइप्रस), वसन्त राज मिश्र (चिली), श्रीराम लामिछाने (लक्जमवर्ग), राजेन्द्रकुमार खेतान (पोर्चुगल), आङ छिरिङ शेर्पा (बेल्जियम), प्रदीपकुमार श्रेष्ठ (दक्षिण अफ्रिका), वसन्त चौधरी (मोरोक्को) र लोकमान्य गोल्छा (पोल्यान्ड) लाई सम्मान गरेका थिए।

साधारणसभाले नयाँ डिनका रुपमा अनररी कन्सुल जनरल विष्णुकुमार अग्रवाललाई चयन गरेको छ। सन् २०१० देखि चेक रिपब्लिकको अनररी कन्सुल रहेका अग्रवाललाई सन् २०१५ मा अनररी कन्सुल जनरलमा पदोन्नति गरिएको थियो।

भर्खरै नेपाल उद्योग परिसंघको अध्यक्षको कार्यकाल पूरा गरेका अग्रवाल एमएडब्ल्यू ग्रुप अफ कम्पनिजका प्रबन्ध निर्देशक छन्। उनलाई सन् २०१९ मा चेक रिपब्लिकको प्रागमा आयोजना भएको वर्ल्ड अनररी कन्सुलमा संसारकै सर्वोत्कृष्ट कन्सुल अवार्डबाट सम्मान गरिएको थियो।

कार्यक्रममा धन्यवाद ज्ञापन गर्दै एचसीसीएनका नवनियुक्त डिन अग्रवालले देशलाई आवश्यक परेको समयमा अनररी कन्सुलहरुले व्यक्तिगत स्वार्थबाट माथि उठेर नेपाल र आफूले प्रतिनिधित्व गर्ने मुलुकप्रतिको जिम्मवारीलाई निर्वाह गरेको बताए। २०७२ को विनाशकारी भूकम्प र कोभिडको महामारीका बेलामा पनि एचसीसीएन सदस्यहरुले आफूले प्रतिनिधित्व गर्ने मुलुकका नागरिकको उद्धार गर्न र सुरक्षित रुपमा आफ्नो मुलुकमा फर्कन मद्दत गरेको उल्लेख गरे।

‘एचसीसीएनले नेपाल सरकार र सम्बन्धित मुलुकबीच पुलको रुपमा काम गर्दै आएको छ। म परराष्ट्रमन्त्रीलाई एचसीसीएनलाई परराष्ट्र मन्त्रालयले आफ्नो महत्वपूर्ण अंगका रुपमा लिएर पर्यटन, वैदेशिक लगानी, स्वदेशी उत्पादनको प्रवर्द्धन, द्विपक्षीय सम्बन्धको विस्तारलाई अझ बढावा दिन आग्रह गर्न चाहन्छु’, उनले भने।

नवनियुक्त डिनले निवर्तमान डिन दिनेश श्रेष्ठ र उनको टिमलाई एचसीसीएनको महत्वलाई नयाँ उचाइमा पुर्याएकोमा धन्यवाद पनि दिए।

 

तपाईको प्रतिक्रिया