Online Arthik
माइक्रोसफ्ट र ओपनएआईले मङ्गलबार उनीहरूको ऐतिहासिक कृत्रिम बौद्धिकता साझेदारीमा व्यापक सुधार गर्दै नयाँ संरचित सम्झौताको घोषणा गरेका छन्। यस नयाँ सहमतिले दुबै कम्पनीलाई अझ स्वतन्त्रता दिँदै पनि घनिष्ठ सहकार्यलाई निरन्तरता दिने लक्ष्य राखिएको छ।
ओपनएआईको वेबसाइटमा प्रकाशित ब्लगपोस्टअनुसार, माइक्रोसफ्टले पुनर्गठित ओपनएआईमा करिब २७ प्रतिशत स्वामित्व प्राप्त गरेको छ, जसको मूल्य करिब १३५ अर्ब अमेरिकी डलर बराबर छ। सोसँगै, ओपनएआईले माइक्रोसफ्टको एजुर क्लाउड सेवामा २५० अर्ब डलर बराबरको खरिद गर्ने प्रतिबद्धता जनाएको छ। यद्यपि अब माइक्रोसफ्टसँग ओपनएआईको कम्प्युटिङ प्रदायकको रूपमा पहिलो अस्वीकृति अधिकार रहने छैन।
सम्झौता अनुसार, ओपनएआईका मोडेल र उत्पादनहरूमा माइक्रोसफ्टको बौद्धिक सम्पत्ति अधिकार सन् २०३२ सम्म विस्तार गरिएको छ। संयुक्त वक्तव्यमा दुबै कम्पनीहरूले भनेका छन्, “हामी नयाँ चरणमा प्रवेश गर्दैछौँ, यो सम्झौताले हाम्रो साझेदारीलाई बलियो बनाउँछ र दुवै संस्थाको दीर्घकालीन सफलताको लागि जग निर्माण गर्छ।”
ओपनएआईको नेतृत्व साम अल्टम्यानले गरिरहेका छन्, जसले पछिल्ला वर्षहरूमा अन्य कम्पनीहरूसँग पनि साझेदारी विस्तार गर्ने प्रयास गरिरहेका छन्। माइक्रोसफ्टले सन् २०१९ मा पहिलो पटक ओपनएआईमा १ अर्ब डलर लगानी गरेको थियो र त्यसपछि सन् २०२१ तथा २०२३ मा थप लगानी गर्दै आफ्नो संलग्नता बढाएको थियो। विशेषगरी सन् २०२२ नोभेम्बरमा च्याटजीपीटीको विस्फोटक लोकप्रियता पछि, माइक्रोसफ्टले १० अर्ब डलरको थप लगानीसहित सहकार्यलाई गहिरो बनाएको थियो।
यो नयाँ साझेदारीले दुबै कम्पनीलाई कृत्रिम बुद्धिमत्ताको क्षेत्रमा रूपान्तरणात्मक प्रभाव पार्दै दीर्घकालीन प्रविधिक अग्रसरताको बाटो खोल्ने विश्वास गरिएको छ।
