Online Arthik
मुग्लिन–पोखरा सडक आयोजना अन्तर्गत पश्चिम खण्डमा सडक स्तरोन्नति कार्य सुस्त बनेको छ। पाँच वर्षअघि सुरु भएको सडक विस्तार तथा स्तरोन्नति आयोजना पटक–पटक म्याद थप हुँदासमेत अझै सम्पन्न हुन सकेको छैन। तनहुँको जामुनेदेखि पोखराको सेतीपुलसम्मको ३८ दशमलव ७१ किलोमिटर सडकखण्ड पश्चिम खण्डअन्तर्गत पर्दछ।
आयोजनाको म्याद गत पुसमा तेस्रोपटक थप गर्दै आगामी असार १५ गतेसम्म पुर्याइएको थियो। तर पछिल्लो प्रगति हेर्दा निर्धारित अवधिभित्र निर्माण सम्पन्न हुने सम्भावना न्यून देखिएको छ।आयोजनाका अनुसार पेट्रोलियम पदार्थको आपूर्तिमा समस्या, निर्माण सामग्रीको मूल्यवृद्धि तथा पछिल्ला दिनमा परेको लगातार वर्षाले निर्माण कार्य प्रभावित बनेको हो। मूल्यवृद्धिका कारण निर्माण कम्पनीले अत्यावश्यकबाहेक अन्य काममा अपेक्षित गति दिन नसकेको जनाएको छ।मुग्लिन–पोखरा सडक योजना पश्चिम खण्डका योजना प्रमुख कृष्णबहादुर कुँवर का अनुसार हालसम्म आयोजनाको भौतिक प्रगति ७८ प्रतिशत पुगेको छ। उनका अनुसार कुल सडकखण्डमध्ये पहिलो तहको कालोपत्रे ३८ किलोमिटर तथा दोस्रो तहको कालोपत्रे ३७ दशमलव २८ किलोमिटर सम्पन्न भइसकेको छ।आयोजनाअन्तर्गत २० दशमलव ५५ किलोमिटर चार लेन सडक तथा १८ दशमलव १६ किलोमिटर चार लेनसहित सर्भिस लेन निर्माण गर्नुपर्नेछ। योजना प्रमुख कुँवरले इन्धन अभावले निर्माणमा प्रत्यक्ष असर परेको बताए।उनले भने, “निर्माण कम्पनीलाई दैनिक चार हजार लिटर डिजेल आवश्यक पर्छ, तर अहिले एक हजार ५०० लिटर मात्र उपलब्ध भइरहेको छ। निर्माण सामग्रीको मूल्यसमेत अत्यधिक बढेकाले काम प्रभावित भएको छ। यसले निर्धारित समयमा आयोजना सम्पन्न गर्न कठिन भएको छ।”
योजनाका सूचना अधिकारी अनन्त बराल का अनुसार कालोपत्रे सम्पन्न भएका क्षेत्रमा सर्भिस लेन निर्माण, सडक मार्किङ, थर्मोप्लास्टिक पेन्ट तथा ‘डब्लु बिम रोड सेफ्टी ब्यारियर’ जडानको काम भइरहेको छ।नेपालको प्रमुख विकास साझेदार एशियाली विकास बैंक को लगानीमा सञ्चालित उक्त आयोजनाअन्तर्गत पश्चिम खण्ड निर्माणका लागि चिनियाँ कम्पनी यनहुइ काइयुयान हाइवे एन्ड ब्रिज कन्स्ट्रक्सन सँग रु सात अर्ब ४० करोडमा ठेक्का सम्झौता गरिएको थियो।
उक्त खण्डको निर्माण सम्झौता विसं २०७८ जेठ २ गते भएको थियो भने २०७८ भदौ १२ गतेदेखि निर्माण कार्य सुरु गरिएको थियो।
