Online Arthik
नेपाल दूरसञ्चार प्राधिकरणले स्वीकृत मापदण्डविपरीत इन्टरनेट सेवा तथा प्याकेज बिक्री गरेको भन्दै १४ वटा इन्टरनेट सेवा प्रदायकलाई जनही ५० हजार रुपैयाँ जरिवाना गरेको छ। प्राधिकरणका अनुसार निर्देशन पालना नगरेको, स्वीकृत प्याकेजअनुसार सेवा उपलब्ध नगराएको, तोकिएभन्दा बढी शुल्क लिएको तथा स्वीकृतिबिनाका प्याकेज बिक्री गरेको पाइएपछि दूरसञ्चार ऐन, २०५३ को दफा ४७ (१) बमोजिम कारबाही गरिएको हो। जरिवानामा पर्ने कम्पनीहरूमा ब्रोडलिङ्क, क्लासिक टेक, वेब सर्फर, फाइबरवर्ल्ड, भायानेट, एरोनेट, डिश मिडिया नेटवर्क, वाइफाइ नेपाल, सिजी कम्युनिकेसन, वर्ल्डलिङ्क, फर्स्ट लिङ्क, पोखरा इन्टरनेट, टेकमाइन्ड्स नेटवर्क र सुबिसु रहेका छन्। प्राधिकरणले स्वीकृतिबिनाका प्याकेज तथा शुल्क तत्काल बन्द गर्न सम्बन्धित कम्पनीहरूलाई निर्देशन दिएको छ। साथै, त्यस्ता सेवाका कारण ग्राहकलाई क्षति पुगेको भए ग्राहकको मागका आधारमा क्षतिपूर्ति उपलब्ध गराउन पनि निर्देशन दिएको छ।
