Online Arthik
लक्ष्मी सनराइज क्यापिटल लिमिटेड द्वारा व्यवस्थापन गरिएको ‘एलएस होराइजन १२’ योजनामा लगानीकर्ताको उल्लेखनीय आकर्षण देखिएको छ। मागभन्दा अत्यधिक आवेदन परेपछि योजनाको इकाई बिक्री आवेदन निर्धारित समयअघि नै बन्द गरिएको कम्पनीले जनाएको छ।
लक्ष्मी सनराइज बैंक लिमिटेड कोष प्रवर्द्धक तथा लक्ष्मी सनराइज क्यापिटल लिमिटेड योजना व्यवस्थापक रहेको यस बन्दमुखी सामूहिक लगानी योजनाको १२ करोड इकाई बिक्रीका लागि वैशाख ३० गतेदेखि सार्वजनिक निष्कासन खुला गरिएको थियो। तर, बिक्री खुला भएको छ कार्यदिनभित्रै १ अर्ब ५० करोड रुपैयाँभन्दा बढी बराबरको आवेदन प्राप्त भएपछि आजदेखि आवेदन प्रक्रिया बन्द गरिएको हो। प्राप्त आवेदनका आधारमा कोषको आकार प्रारम्भिक १ अर्ब २० करोड रुपैयाँबाट बढेर करिब १ अर्ब ५० करोड रुपैयाँसम्म पुग्न सक्ने अनुमान गरिएको छ।
€यो लक्ष्मी सनराइज क्यापिटलको सातौं सामूहिक लगानी योजना हो। कम्पनीअन्तर्गत हालसम्म सञ्चालनमा आएका योजनामध्ये एउटा खुलामुखी (ओपन एन्डेड) योजना रहेको छ भने तीन वटा योजनाको अवधि पूरा भइसकेको छ। योजनाको कुल निष्कासनमध्ये बीज पूँजीबापत १ करोड ८० लाख इकाई लक्ष्मी सनराइज बैंक लिमिटेडलाई सुरक्षित राखिएको छ भने बाँकी १० करोड २० लाख इकाई सर्वसाधारण लगानीकर्ताका लागि निष्कासन गरिएको थियो। लगानीकर्ताले न्यूनतम १०० कित्तादेखि अधिकतम १ करोड २० लाख इकाईसम्म आवेदन दिन सक्ने व्यवस्था गरिएको थियो। आवेदन नेपाल धितोपत्र बोर्डबाट स्वीकृति प्राप्त बैंक तथा वित्तीय संस्थाका आस्वा सेवा केन्द्रमार्फत संकलन गरिएको थियो।
कम्पनीका अनुसार छोटो अवधिमै योजनाप्रति प्राप्त उत्साहजनक सहभागिताले नेपाली पूँजी बजारप्रति लगानीकर्ताको विश्वास अझ मजबुत बन्दै गएको संकेत गरेको छ। उक्त योजनाको धितोपत्र निष्कासन तथा बिक्री प्रबन्धकको जिम्मेवारी पनि लक्ष्मी सनराइज क्यापिटल लिमिटेडले नै निर्वाह गरेको हो।
