Online Arthik
अन्तर्राष्ट्रिय बजारमा सुनको मूल्य बिहीबार दुई महिनाभन्दा बढी समययताकै उच्च स्तरनजिक पुगेको छ। अमेरिकी ट्रेजरी विभागले दीर्घकालीन ऋणपत्रको तरलता समर्थनसम्बन्धी कार्यक्रम विस्तार गर्ने घोषणा गरेपछि अमेरिकी बन्डको प्रतिफल र डलर कमजोर हुँदा सुनको मूल्यमा उल्लेख्य वृद्धि भएको हो।
यो समाचार तयार पार्दासम्म स्पट गोल्डको मूल्य ३.०१ प्रतिशत अर्थात् १३२ डलरले बढेर प्रतिऔंस ४ हजार ४९६ डलर पुगेको छ। कारोबारका क्रममा सुनको मूल्य प्रतिऔंस ४ हजार ५२५.७९ डलरसम्म पुगेको थियो, जुन जुन २ यताकै उच्च स्तर हो। बुधबार मात्रै सुनको मूल्य ४ प्रतिशतभन्दा बढीले बढेको थियो। अमेरिकी ट्रेजरी विभागले दीर्घकालीन नोट तथा बन्डका लागि सञ्चालन गरिने ऋण पुनर्खरिद कार्यक्रमअन्तर्गत तरलता समर्थनको आकार दोब्बर गर्दै कम्तीमा ४ अर्ब डलर पुर्याउने घोषणा गरेको थियो। उक्त घोषणापछि दीर्घकालीन अमेरिकी ट्रेजरी बन्डप्रति माग बढ्दा तिनको प्रतिफल घटेको छ।यता, अमेरिकी डलर कमजोर हुँदा अन्य मुद्रामा कारोबार गर्ने लगानीकर्ताका लागि डलरमा मूल्य निर्धारण हुने सुन तुलनात्मक रूपमा सस्तो बनेको छ। यसले सुनको माग बढाउन थप सहयोग गरेको छ।अमेरिकी ट्रेजरी विभागका अनुसार अमेरिकाको कुल सरकारी ऋण पहिलोपटक ४० ट्रिलियन डलरभन्दा माथि पुगेको छ। सामाजिक सुरक्षा तथा अन्य सामाजिक कार्यक्रमको बढ्दो खर्च, ब्याज भुक्तानीमा भएको तीव्र वृद्धि र कर कटौतीका कारण सरकारी आम्दानीमा परेको दबाबले अमेरिकी वित्तीय अवस्थाबारे थप चिन्ता बढाएको छ।यसैबीच, अमेरिकी फेडरल रिजर्भको गत महिनाको बैठकको विवरणले मुद्रास्फीतिबारे नीतिनिर्माताहरूको चिन्ता कायमै रहेको देखाएको छ। केही अधिकारी ब्याजदर बढाउन तयार देखिएका थिए भने अधिकांशले मुद्रास्फीति फेडको २ प्रतिशत लक्ष्यतर्फ नघटेमा ब्याजदर वृद्धि आवश्यक पर्न सक्ने बताएका थिए।
अन्य बहुमूल्य धातुमध्ये चाँदीको मूल्य पनि ४.८५ प्रतिशत अर्थात् ३ डलरले बढेर प्रतिऔंस ६७ डलर पुगेको छ।
