Online Arthik
नेपालमा ब्याट्रीको प्रयोग तथा आयात बढ्दै गएको समयमा चीनका ब्याट्री निर्माता कम्पनीका प्रतिनिधि र नेपालभरका ब्याट्री आयातकर्ता तथा व्यवसायीबीच प्रत्यक्ष भेटघाट तथा छलफल हुने भएको छ। चीनबाट नेपालमा ब्याट्री तथा विद्युतीय सामग्रीको आयात बढिरहेको अवस्थामा नेपाली बजारको वास्तविक आवश्यकता, उपभोक्ताको माग, उत्पादनको गुणस्तर, मूल्य तथा आपूर्ति व्यवस्थापनबारे प्रत्यक्ष जानकारी लिन उक्त भेटघाट आयोजना गर्न लागिएको हो। ललितपुरस्थित एन्जल ट्रेड सेन्टरको कार्यालयमा चीनबाट आएका ब्याट्री निर्माता कम्पनीका प्रतिनिधिले नेपालमा ब्याट्री आयात तथा वितरण गर्दै आएका व्यवसायीसँग प्रत्यक्ष छलफल गर्नेछन्। अगस्ट २३ देखि २६, २०२६ सम्म सञ्चालन हुने कार्यक्रममा नेपालका विभिन्न जिल्लाबाट ब्याट्री आयात, थोक बिक्री, वितरण तथा विद्युतीय ऊर्जा क्षेत्रमा आबद्ध व्यवसायी सहभागी हुने अपेक्षा गरिएको छ। पछिल्लो समय विद्युतीय सवारीसाधन, सौर्य ऊर्जा, इन्भर्टर, ऊर्जा भण्डारण प्रणाली, दूरसञ्चार, औद्योगिक उपकरणलगायत क्षेत्रमा ब्याट्रीको प्रयोग बढ्दै गएकाले नेपाली बजारमा आवश्यक ब्याट्रीको प्रकार, क्षमता, गुणस्तर, मूल्य तथा प्रयोगको क्षेत्रबारे निर्माता कम्पनीलाई प्रत्यक्ष जानकारी गराउनु महत्वपूर्ण हुने व्यवसायीहरूको भनाइ छ। कार्यक्रममा नेपाली आयातकर्ता तथा व्यवसायीले बजारको वास्तविक आवश्यकता, ग्राहकको माग, देखिएका समस्या तथा प्रयोग भइरहेका ब्याट्रीबारे चिनियाँ निर्माता कम्पनीका प्रतिनिधिसँग छलफल गर्नेछन्। छलफलबाट कुन प्रकारका ब्याट्रीको माग बढी छ, कुन क्षमताका उत्पादन आवश्यक छन्, मूल्य तथा गुणस्तरको अवस्था कस्तो छ र भविष्यमा कुन प्रकारका ब्याट्रीको माग बढ्न सक्छ भन्ने विषयमा बजार जानकारी सङ्कलन गरिनेछ। यसबाट प्राप्त जानकारीका आधारमा निर्माता कम्पनीले नेपाली बजारलाई लक्षित गरी उत्पादनको गुणस्तर, क्षमता, मूल्य तथा डिजाइनमा सुधार गर्नुका साथै नयाँ उत्पादन विकास गर्न सक्ने सम्भावना रहेको बताइएको छ। विशेषगरी लिथियम ब्याट्री, सौर्य ब्याट्री, विद्युतीय सवारीका ब्याट्री, ब्याट्री सेल तथा ब्याट्री व्यवस्थापन प्रणालीलगायत क्षेत्रमा बजारअनुकूल उत्पादन विकासबारे छलफल हुने अपेक्षा गरिएको छ। चीनका निर्माता र नेपाली आयातकर्ताबीच प्रत्यक्ष सम्बन्ध स्थापना भएपछि नियमित आपूर्ति, थोक खरिद, उत्पादन अनुकूलन तथा दीर्घकालीन व्यावसायिक साझेदारीको सम्भावना पनि बढ्ने अपेक्षा गरिएको छ। साथै, नेपालमा ब्याट्रीको प्रयोग बढ्दै जाँदा प्रयोग भइसकेका ब्याट्रीको सङ्कलन, पुनःप्रयोग तथा पुनर्चक्रणको विषय पनि महत्वपूर्ण बन्दै गएकाले भविष्यमा ब्याट्री व्यवसायलाई आयात र बिक्रीमा मात्र सीमित नराखी उत्पादनदेखि आपूर्ति, प्रयोग, सङ्कलन, पुनःप्रयोग र पुनर्चक्रणसम्मको सम्पूर्ण चक्रका रूपमा विकास गर्नुपर्ने आवश्यकता रहेको सरोकारवालाहरूको भनाइ छ। चीनका निर्माता र नेपाली व्यवसायीबीचको प्रत्यक्ष भेटघाटले व्यापारिक कारोबारसँगै दीर्घकालीन आपूर्ति, बजारअनुकूल उत्पादन, प्रविधि आदानप्रदान तथा नेपालमा ब्याट्री क्षेत्रको व्यवस्थित विकासका लागि आधार तयार गर्ने अपेक्षा गरिएको छ।
