सुन–चाँदीको मूल्यमा तीव्र गिरावट, लगानीकर्तामा चिन्ता

नेपाली बजारमा सुनको मूल्य निरन्तर ओरालो लागिरहेको छ। नेपाल सुनचाँदी व्यवसायी महासंघ का अनुसार आज सुनको भाउ तोलामै ६ हजार ५०० रुपैयाँले घटेर प्रतितोला २ लाख ७५ हजार ५०० रुपैयाँ कायम भएको छ, जुन अघिल्लो दिन २ लाख ८२ हजार रुपैयाँ थियो। सुनसँगै चाँदीको मूल्य पनि घटेको छ र आज तोलामा ११५ रुपैयाँले कमी हुँदै ४ हजार ४२५ रुपैयाँमा झरेको छ। अन्तर्राष्ट्रिय बजारमा पनि सुन र चाँदी दुवैमा तीव्र गिरावट देखिएको छ, जहाँ सुन करिब ४,३५० डलर प्रति औंस र चाँदी ६५ डलर आसपासमा झरेका छन्, जसले एकैदिन ४–६ प्रतिशतसम्मको गिरावट देखाएको छ। यस्तो गिरावटका पछाडि बलियो अमेरिकी डलर, बढ्दो ब्याजदरको दबाब, तेल मूल्य वृद्धिबाट उत्पन्न मुद्रास्फीति चिन्ता, लगानीकर्ताद्वारा नाफा सुरक्षित गर्ने प्रवृत्ति (प्रफिट–टेकिङ) तथा सुनमा अत्यधिक लगानी भइसकेको अवस्था (ओभरक्राउडेड ट्रेड) जस्ता कारणहरू देखिएका छन्। साथै, सुरक्षित सम्पत्तिको रूपमा सुनको आकर्षण केही कमजोर देखिएको छ भने चाँदी औद्योगिक धातु समेत भएकाले आर्थिक सुस्तताले यसको माग झन् घटाएको छ, जसका कारण यसको मूल्य अझ बढी घटेको छ। यद्यपि केही अन्तर्राष्ट्रिय विश्लेषकहरूले छोटो अवधिमा सुनको मूल्य अझै घट्न सक्ने अनुमान गरेका छन् भने दीर्घकालमा JP Morgan र BNP Paribas लगायतले पुनः वृद्धि हुने प्रक्षेपण गरेका छन्। त्यसैले हालको गिरावटलाई धेरैले सामान्य “कररेक्शन” का रूपमा व्याख्या गर्दै दीर्घकालीन उकालो प्रवृत्ति अझै कायम रहेको बताएका छन्, जसले लगानीकर्ताका लागि अहिलेको अवस्था जोखिम र अवसर दुवै भएको संकेत गर्दछ।