Online Arthik
लामो समयदेखि बन्द अवस्थामा रहेको हेटौँडा कपडा उद्योगलाई पुनः सञ्चालनमा ल्याउने सरकारी तयारी तीव्र बनेको छ। उद्योग सञ्चालनको सम्भाव्यता अध्ययन, आवश्यक पूर्वतयारी तथा सरोकारवाला निकायबीचको समन्वयलाई सरकारले प्राथमिकताका साथ अघि बढाएको छ।
विसं २०३२ सालमा स्थापना भई २०३५ सालदेखि उत्पादन सुरु गरेको हेटौँडा कपडा उद्योग विसं २०५७ सालदेखि पूर्ण रूपमा बन्द अवस्थामा रहेको छ। विगतमा उद्योग पुनर्जीवनका लागि विभिन्न प्रयास भए पनि ती सफल हुन सकेका थिएनन्। तर पछिल्लो समय सरकारले रुग्ण उद्योगहरू पुनः सञ्चालन गर्ने नीति लिएपछि हेटौँडा कपडा उद्योग पुनः चर्चामा आएको हो।उद्योग परिसरमा रहेका अधिकांश मेसिन तथा उपकरण सामान्य मर्मतपछि सञ्चालनयोग्य अवस्थामा रहेको प्रारम्भिक अध्ययनले देखाएको छ। यसले उद्योगलाई पुनः सञ्चालनमा ल्याउन सकिने सम्भावना बलियो बनाएको सम्बन्धित निकायहरूको भनाइ छ।प्रधानमन्त्री तथा मन्त्रिपरिषद्को कार्यालयको समन्वयमा उद्योग पुनः सञ्चालनको प्रक्रिया अघि बढाइएको छ। यसै क्रममा उद्योग, वाणिज्य तथा आपूर्ति मन्त्री गौरीकुमारी यादव ले उद्योगको स्थलगत निरीक्षण गर्दै आवश्यक तयारीलाई तीव्र बनाइएको जानकारी दिएकी छन्।
मन्त्री यादवका अनुसार हेटौँडा कपडा उद्योगसँगै बुटवल धागो कारखाना र बाँके कपास उत्पादन कारखाना लाई समेत पुनः सञ्चालन गर्ने योजना सरकारको रहेको छ। यसबाट स्वदेशी वस्त्र तथा कपासजन्य उद्योगको पुनरुत्थानमा सहयोग पुग्ने अपेक्षा गरिएको छ।उद्योगको अवस्थाबारे जानकारी लिन मीनाकुमारी लामा सहित मकवानपुरका प्रमुख जिल्ला अधिकारीको टोलीले पनि स्थलगत निरीक्षण गरेको छ। टोलीले उद्योगका संरचना, मेसिनरी तथा सञ्चालनका सम्भावनाबारे जानकारी लिएको थियो।विसं २०७५ सालदेखि उद्योग परिसरमा सशस्त्र प्रहरी बलको १४ नम्बर गण बस्दै आएको छ। सुरक्षा व्यवस्थामा सुधार आएपछि उद्योग क्षेत्रको संरक्षण तथा व्यवस्थापन प्रभावकारी बनेको बताइएको छ।हाल नेपाली सेना, सशस्त्र प्रहरी बल र नेपाल प्रहरीको संयुक्त पहलमा उद्योग परिसरको सरसफाइ तथा व्यवस्थापन कार्यसमेत भइरहेको छ। यसले उद्योग पुनः सञ्चालनको वातावरण तयार पार्न सहयोग पुगेको सरकारी अधिकारीहरूको भनाइ छ।सरकारले चालु आर्थिक वर्षभित्रै हेटौँडा कपडा उद्योग पुनः सञ्चालनमा ल्याउने लक्ष्य राखेको छ। उद्योग पुनः सञ्चालन हुन सकेमा स्वदेशी उत्पादन प्रवर्द्धन, रोजगारी सिर्जना तथा आयात प्रतिस्थापनमा महत्वपूर्ण योगदान पुग्ने अपेक्षा गरिएको छ।
